* Refalfiu: hastío causado por la abundancia; cuando has hecho, comido o disfrutado de algo sin comedimiento, “tas refalfiáu”.
Na Escalera 16 de la Playa San Llorienzo ta la zona que se conoz como “El Tostaderu”, na boca del ríu Piles.
En cualesquier época del añu, Pelayo, Álvaro, Leri, Carmen, Macio y otres y otros xixoneses con alma de llargatu van p’allá nun visveo, cola crema na mano, en cuantes hai un rellugu.
Porque, polo que dicen, la muria d’El Tostaderu recueye y guarda tolos rayos de sol qu’aporten a Xixón. Un microclima, vaya. Y por eso ye ellí onde va la xente profesional a tostar.
En Xixón tamos mui arguyoses/os d’El Piles, el nuestru ríu. Sabemos que nun ye gran cosa, pero tenémos-y ciñu. El puente El Piles ye como los de París, pero más pequeñín y humilde. Crucialu llévanos dende El Muro al otru llau del ríu y lo primero qu’atopamos ye... el Tostaderu.
Equí nun llueve muncho. Bueno sí, dacuando. Va por temporaes. O por díes. O por hores. Pero cuando sal el sol cola so lluz alluma la nuestra ciudá preciosa y sal tol mundu a recibilu. Eso sí, cuando asoma pente les nubes, “pica” que se mata.
Somos mui conscientes d’esti privilexu. Tenemos muncha ciudá y munchu entornu natural, maraviyosos p’andar, pero un clásicu ye andar El Muro. Dende la ilesia San Pedro hasta La Lloca son 3 kilómetros de paséu cabo la mar. Cualquier hora ye bárbara, pero encamentámoste l’atapecer.
Les rapacines y rapacinos (y dalgún proxenitor/a entregáu/ada), cuando ta baxa la marea, echen hores en buscar con arte pente les roques quisquilles, bígaros, camarones y demás fauna marina, col envís de cazar o namás d’investigar. El modelu: gorra, crema pal sol, cangrexeres, calderu y truel.
Si sigues pel paséu dende El Tostaderu, vas llegar hasta El Rinconín. Ellí hai un par de sableres (nuna d’elles ta permitío entrar con perros tol añu) y una zona verde bien grande con palmeres y xuegos infantiles. Si nun te presta l’arena, nel parque d’El Rinconín puedes tomar el sol, descansar o pasear a los tos deleres.
Vivir bien tien la so ciencia
