* Hasta l’Imperiu romanu se rindió ente los encantos de la nuestra bebida sagrada.
¿Pa qué engarranos si podemos compartir un culín?
Va unos2000 años, tres qu’acabaren les guerres asturcántabres, l’Imperiu romanu asitió no qu’anguaño ye’l conceyu de Xixón. Salvamos que nos dexaron una carrapotada de restos arqueolóxicos: les termes d’El Campu Valdés, la muria, la villa de Veranes... Bono, eso y la sidra. Calla, non, la sidra nun lo traxeron ellos. De fechu, hai quien diz que yeren mas de vinu... Sicasí, decatámonos que la xente de l’Asociación Cultural Antiqvi Mores, que son más romanos que los romanos, beben sidra a esgaya, vamos, que-yos presta pola vida.
Sí, equí somos ástures y tamién somos romanos, pero sobre too somos xente sidrero. L’agua danos la vida y alimenta la naturaleza, pero la sidra aliméntanos l’espíritu. ¿Imaxináis a los lexonarios romanos escanciando culinos ente los ástures? Va ser por eso polo que nos presta tanto la folixa.
Prebar la sidra precisa toa una lliturxa. Nun queremos que conozas toles normes, namás les más básiques: hai que lo escanciar en condiciones pa qu’espalme y espierten los sabores y arumes (nun tienes que lo facer tu, pa eso ta’l personal de los chigres); sírvese per rondes y hai que lo beber nel intre y d’un tirón. Y alcuérdate: ¡nun cometas el sacrilexu de bebelo como si fuera vinu o cerveza!
¿Sabíes que n’Asturies tenemos más de 2000 variedaes de mazana autóctono? Tienen unos nomes guapísimos: blanquina, raxao, teórica, perezosa, prieta, xuanina, ernestina, coloradona...
El sitiu semáu de pumares llámase pumarada. Si das un paséu pela fastera rural de Xixón, vas topar bien de praos enllenos de pumares , col so arrecendor inconfundible.
Na redoladade Xixón vas poder alcontrar una montonera de llagares, que ye onde se fai la sidra. Invitámoste a conocelos nuna visita guiada, descubrir el procesu d’ellaboración y disfrutar d’una tastia. Muncha xente completa la visita con una espicha, una comida informal tradicional con quesu, tortiella, chorizu a la sidra y otros bocaos bien ricos d’estilu caseru.
Estrabón yá falaba nel sieglu I e.C. d’una bebida que tomaben los astures nomada zythos. L’abondancia de mazana y l’ausencia d’uva y cereales escarten otres bebíes y ye mui probable que se refiriera a la nuestra sidra. La pallabra sidra vien del griegu sikera, y d’ehí sizra.
Ente los sieglos VI y V a. C., los cilúrnigos habitaron un castru nel cabu Torres, mui cerca de Xixón. Más p’alantre, romanizóse y pasó a llamase Oppidum Noega. Nél ta asitiáu anguaño’l Parque Arqueolóxicu-Natural de La Campa Torres y el yacimientu arqueolóxicu colos restos del asitiamientu que compartieron ástures y romanos. ¿Compartiríen tamién por primer vez un culín de sidra?
Tres la llegada de Roma, los habitantes d’esti territoriu allugáronse na península qu’anguaño llamamos Cimavilla. Nesti barriu tan auténticu vas poder ver l’antigua muria romana y visitar el Muséu Termes Romanes d’El Campu Valdés, al llau de la playa de San Llorienzo, la ilesia de San Pedro y la estatua de César Augusto.
A pocos kilómetros de la ciudá, alcontramos una villa tardorromana que güei ye un muséu. Trátase d’un gran complexu residencial y agrariu onde se conserva un mosaicu de munchu valor. Los romanos que daquella teníen perrres tamién construyíen casoplones, ¿home, entós?
Vivir bien tien la so ciencia
