* Maru, de 76 años, báñase col so “grupín” tolos díes a les 8 la mañana, seya branu o iviernu, na playa San Llorienzo, concretamente na escalera 2, que llamen con cariñu
“La Rampina”.
“Ye lo mejor del día”, asegura.
Xixón abraza la mar cola ensenada de San Llorienzo. Dende San Pedro hasta La Lloca, millares de xixoneses y de visitantes percuerren tolos díes el paséu marítimu que llamamos El Muro, demientres tol añu. La nuestra rellación cola mar ye intensa y marca’l nuestru carácter.
La playa de San Llorienzo tien un llargor de 1 km y mediu y ta dividida en 16 accesos o escaleres, que van dende la escalera 0 (“La Cantábrica”), detrás de la Ilesia San Pedro, hasta la zona qu’avezamos llamar “el Tostaderu”, na boca del ríu Piles.
Pero, amás de San Llorienzo (la más conocida), nel conceyu tenemos 8 sableres más, unes urbanes y otres más naturales.
La playa, pa nós, nun ye namás pa tomar el sol: ye pa pasiar pela oriella, pa sacar a los perros pel iviernu, pa facer surf, pa xugar al fútbol y al volei... o pa garrar andariques nel pedreru.
Na escalera cero o “La Cantábrica” entama’l paséu d’El Muro de San Llorienzo. Dende ehí vese’l Club de Regatas y la subida pel barriu de Cimavilla hacia L’Atalaya, onde s’alluga l’Elogio del Horizonte, la escultura xigante de Chillida, y dende la que puedes disfrutar d’una vista panorámica de Xixón.
Grupos de persones, como les y los protagonistes del vídeu que puedes ver nesta web representando’l Primer Principiu de la Xixonomía, aconceyen toles mañanes na “rampina” o en La Escalerona pa dase un calón.
La Madre del emigrante ye conocida popularmente como ‘La lloca’l Rinconín’ o ‘La muyerona’. Ye una escultura de Ramón Muriedas Mazorra n’homenaxe a la emigración asturiana.
Con aspeutu xostrón y visaxe desencaxáu, la nuestra “lloca” más querida despide a los fíos que s’alloñen nel horizonte.
Los partíos de fútbol-playa entámense tolos fines de semana. Xente de toles edaes aconceya a la hora que permite la marea, pues ye preciso xugar en baxamar.
En Xixón, les escaleres d’accesu a la playa de San Llorienzo dende’l paséu marítimu (“El Muro”) tán numberaes. Dacuando usámosles como referencia espacial: “a l’altura de la 12”, por exemplu. Bono, pues la más grande, la del reló, la del termómetru xixante, la más famosa... ye La Escalerona.
¿Vémonos en La Escalerona?
Vamos publicar ensiguida más principios del Tratáu de Xixonomía y, con ellos, más histories y más personaxes.
Mientres, puedes somorguiate nos requexos de la nuestra ciudá al traviés de la páxina de Visita Gijón/Xixón. O meyor tovía, ¡ven a visitanos!
