* Ms. Marshall ye esperta en Xixonomía...
pero tovía tien muncho que descubrir.
Ms. Marshall aporta a Xixón dende la Universidá de Harvard, en Massachusetts, p’acudir al I Congresu Internacional de Xixonomía, ciencia na que ye una erudita renomada... anque namás nel planu teóricu, pa dicir verdá. Ta trescurriendo too bárbaro: la ciudá non solo ye acoyedora y ablucante, sinón qu’amás tien infraestructures y servicios profesionales que garanticen el ésitu de cualesquier eventu d’esti calter.
Pero Ms. Marshall, que creyía que yera una esperta, sintióse una profana cuando descubrió que la xente yera muncho más de lo que-y contaren. Nun pasa nada, nun par de díes yá se convirtió nuna playa más. Diz qu’igual queda equí... “porque-y presta pola vida”.
Con 160.000 m2 y un allugamientu privilexáu, el recintu ferial Luis Adaro cuenta colos servicios necesarios p’agospiar feries, congresos y esposiciones.
Ye equí onde se celebra tolos branos la Feria Internacional de Muestres d’Asturies (“la Feria”, como la llamamos equí), ún de los reclamos turísticos y profesionales más importantes d’Asturies.
Ente los equipamientos del recintu ferial destaca’l Palaciu de Congresos, un espaciu singular, completu y versátil, preparáu pa tou tipu d’eventos.
La Oficina de Congresos de Xixón o Gijón Convention Bureau ye una ferramienta del Conceyu que funciona como “ventaniya única” pa les y los promotores de congresos, xuntes y eventos. Apurre información útil sobre instituciones, infraestructures, servicios y empreses, amás d’un acompañamientu mientres el procesu d’organización del alcuentru no que fai a planificación, difusión, producción o xestión.
¿Ónde puedes atopar a les y los meyores profesionales pa entamar, desarrollar y producir el to eventu en Xixón? Xente que conoz el terrenu, esperta, con remangu, comunicativa, célebre... Pues quién va ser. Yá te lo diximos too, pero si quies más detalles, equí va un adelantu: OPC y axencies d’eventos.
Tamién somos accesibles y cercanos :-)
Tamos a una media hora del Aeropuertu d’Asturies, que tien conexones coles principales ciudaes españoles y delles europees.
La rede de carreteres y autovíes enllázanos con Uviéu y Avilés, col cordal cantábricu, con Madrid y col restu d’España.
Y, por supuestu, tenemos el tren, yá que RENFE y FEVE tienen la estación metranes la ciudá. Amás, ¡yá ta operativu’l serviciu d’alta velocidá!
Si quies entamar un eventu o un alcuentru profesional orixinal y inolvidable de verdá, nun van faltate opciones. En Xixón tenemos munchos sitios singulares que van adaptase a les tos necesidaes y van superar les tos espectatives. Ente ellos, y ensin salir de la ciudá, l’Acuariu, el Muséu del Ferrocarril o el Muséu del Pueblu d’Asturies.
Como bien sabes, somos persones honestes, trabayadores, campechanes, grandones, fartones... y acoyedores. Pa entamar alcuentros profesionales o namás pa folgar, tienes a la to disposición 9.000 places p’agospiate na ciudá y alredores. ¿Qué quies más?: tienes hoteles urbanos de cadenes de prestixu, hoteles boutique amañosos, agospios rurales...
Vivir bien tien la so ciencia
