Allegres, arrogantes, nobles, célebres... “grandonos”, con una forma peculiar d’entender la vida y tamién d’espresalo. Asina somos.
Si yes visitante, vas descubrir bien rápido qu’hai coses mui xixoneses. Delles veces van chocate, pero nel so contestu too tien sentíu. Nun ye raro que, andando per Xixón, sientas espresiones o pallabres que de mano nun te suenen: chiscar, prestar, estrapayar, mancar, emburriar, fame, folixa... Espresiones del asturianu mécense nel falar de les y los xixoneses ensin que seyamos conscientes de que lo facemos. Pero tamién hai espresiones que son propies de la ciudá: si daquién te manda a “ver la ballena” nun ta encamentándote precisamente que vayas hasta l’Acuariu...
Xixonomía ye una forma de ser, de vivir y de sentir Xixón.
Ye una pasión... una obsesión. Ye'l compendiu de lo que somos nós y la nuestra ciudá.
Conoznos y contaxáte d'esa obsesión sana. Descubri la Xixonomía auténtica.
Xixón y les y los xixoneses merecemos una enciclopedia aparte.
La nuestra pasión por too: la comida, la sidra, la mar, la naturaleza, l'amistá, el pasalo bien, ¡pola vida!... ye dalgo digno d'estudiu.
Poro, tamos iguando un Tratáu de Xixonomía bien completu, un estudiu antropolóxicu... y antolóxicu de Xixón, los sos requexos, les sos costumes y, sobre too, les y los sos interesantes especímenes.
La Xixonomía estructúrase al traviés de los sos Principios Fundamentales, un conxuntu de lleis científiques que rixen la vida de Xixón y de les y los sos habitantes.
Frutu d’años d’observación y estudiu, los Principios Fundamentales son básicos pa entender el carácter y los vezos d’estos personaxes peculiares. Na so ellaboración collaboraron mentes y escueles que dexaron una buelga imborrable na historia de la ciencia y la filosofía. Bono, más que collaborar, robámos-yos dalguna idea, conque la so aportación, claro, ta mui presente.
Col tiempu, pasín ente pasu, vamos dir completando el Tratáu de Xixonomía, desvelando los secretos de caún de los Principios, conociendo especímenes nuevos, descubriendo sitios y retratando comportamientos.
